Covid Zawtnak hi kan Vawlei pi in a dong ti lai lo.

Covid Zawtnak hi kan Vawlei pi in a dong ti lai lo. Kawlram le Chinram zong ah a ra kho peng caah Chinmi kan i ralrin a hau cang.

Minung cung ah zawtnak a tlun le a lut fate a phun aa thlemi, a dangmi (gene- variant) aa thlenmi Covid rungrul phun a chuak peng lai i khuacaan zulh in a cangmi Tlangrai- influenza -Flu bantuk, malaria- raifanh zawtnak, raise (poxes, chicken pox etc.) zawtnak, measles (hmaihu zawtnak) cholera (ngaleo zawtnak) bantuk phun i vawlei ah Covid a chuah peng cang lai.

Hmunkhat hnu hmunkhat ramkhat hnu ramkhat zawtnak i chawnh ahcun a rungrul a phun aa thlen peng lai i nihin kan tonmi Delta variant nak in tih a nung deuhmi le aa dangmi variant- rungrul phun tampi a chuah kho i khamhnak si -vaccines i chunh lawng ah immune system a that lawng ah hi zawtnak hi thei khawh a si cang lai. Nihin ni tiang ah hi rungrul a that khomi si an ser kho rih lo, i khamhnak, pum chung i zawtnak dohtu karh le thawngnak si lawng an chuah khawh rih. Rendesivir le Faviparivir zong hi hi rungrul a karh lo ding lawng in rian a tuan i a that kho tu cu kan immune system a that a hau.

Vaccines- khamhnak si voikhat tel i chunh cang a si ahcun zawtnak i chawnh sual hmanh ah thih khawh a si ti lo, 80 in 100 kar thihnak a khamh.

Lung chuak biaralkah ah…Yangon i a ummi Apollo office hmanh nih thla fatin vanlawng charter in an hlan i India ah mizaw a zuangpi lengmang mi hna zoh ahcun Chinmi i khomh ve i charter flight hlan i India i Covidshield le Covaxin hi vanlawng i va cawk phorh zau i Chinmi vialte i chunh khawh cio siseh law thihnak in tampi a khamh khawh lai. Kal lei le kirlei umkal sithlop a duhmi passengers hna lak pah ahcun si phorh man hi a man a tlawm lai i cold chains storage in thate in phorh khawh a si hnga.

I thlopnak ding ah Oxygen plant sing a thongthong in hrambunhnak in India ah maw Thai ah Covid khamhnak vaccines hi charter flight in va phorh deuh ahcun hmailei zawtnak khamhnak caah a tha bik a si deuh men lai. Third Wave hi peak a phan cang i a dih deng cang caah fourth le fifth wave zeitik a rat lai theih lo a si caah vaccines hi zapi nih chunh khawh cio siseh law nunnak tampi a khamh khawh lai.

United Kingdom tahchunhnak ah kan zoh ahcun Covid i a zawmi nuai 5.98 an si i a thimi 130k an si. Vaccines a chunhmi an milu ah 72% hi voikhat cio an i chunh i 62% hi voihnih cio an i chunh cang hnu ah Delta rungrul nih June thla thawk in a phak ve ciammam hna nain hlan ah vaccines chunh hlan ah nikhat ah 1300 hrawng an thi tawn nain nihin nih ah nikhat ah a thimi hi minung 30 in 75 kar hrawng lawng an si i ni 70 chung ah a buaktlak in nikhat ah 70 hrawng lawng an ti. Cu hmanh cu an Prime Minister Borris Johnson nih July thla ah Covid restrictions vialte a thumh dih i “Freedom Day” a thanh. Euro Cup Soccer zong Wimbledon Tennis zuamnak zong ah mask lo in an zoh cio ko nain tam deuh cu vaccine a chunmi an si caah an thi ti lo timi hmuh khawh a si.

**Pumpak ruahnak lawng a si.