Ka Dai Lai Lo, Dai Naisai Hlah!

Chokhlei parnak kan fing le tlang

Fiakfairok awnhnak kan tlangsang

Kikong tlonlennak kan thupi

Vaurawng parnak kan Lailungrawn

Seino nuamhnak kan dingdi tlang

Kan ram kan i uk tiang

Ka dai lai lo vawlei dongh tiang

Kan lungput i rual seh

Kan kuttlaih fek seh

Kan dirhmun fek seh

Kan ram ah tihphannak a dongh tiang

Kan rian a si, maw vaurawng seino

Ka dai lai lo vawlei dongh tiang

Kan zumhnak fek seh

Kan lung i rual seh,

Kan ral chia hlah seh

Kan thiseng dai hlah seh

Kan semnak ram ah zalonnak a um tiang

Ka dai lai lo vawlei dongh tiang

Tuanbia tialtu Laimi, raltha miphun

Ral a tei pengtu, zumh awk tlak miphun

Zumh awktlak si awk ah nunnak thap in

Kan ram ah nuhrin covo kan hmuh tiang

Nautatnak le thleidannak a dih dongh tiang

Kan rian a si, pa raltha nu raltha maw laikhal

Ka dai lai lo vawlei dongh tiang

Thi in tialmi Dohthlennak

Hla rih hmanh seh, kan thiseng a daih hlan

Kammi thiseng he phungding caah

Bawh lenmi kan thir rangleng he pok in,

Tinhmi lamkhat kan hlawh a tling tiang

Ka dai lai lo vawlei dongh tiang

Pathian sermi Miphun tling

Pupa chanhmi Ram le Vawlei

Dinfelnak le zalonnak khoi ah hen

Miphun covo le ruangnak khoi ah hen

Kan do lai kan nuhring covo kan hmuh tiang

Mahte nawlngeih lairelnak a um tiang

Ka dai lai lo vawlei dongh tiang

Kan ram kan i uk tiang

Kan ram himnak a um tiang

Kan ram zalonnak a len tiang

Kan ram nawlngeihnak kan hmuh tiang

Kan khua kan ram kanmah ta a si tiang

Kan khua kan ram kan lak tiang

Ka dai lai lo, dai naisai hlah!