Khuate Lei Pentlang Thangchonak II

 Khuate Lei Pentlang Thangchonak II

Rampi ah daihnak um hmanh hlah seh law Khuate lei pengtlang thangchonak cu ngol awk a tha lo.

Pengle tlang thangcho ti tik ah mithmuh kuttawnh lawng hi si lo in minung lei thangchonak zong hi a biapi. Human resource development (HRD) hi a rak biapi taktak. HRD hi Lai holh in leh ding a har ngai i minung thazaang thangchonak maw minung pahrang thangchonak hei ti ko uh sihlaw, leicung leitang i a ummi thil vialte, kokek thil vialte kha thahnem in hmanh khawh ding ah fimnak, hngalhnak, thiamnak le technology hman in a tha bik in ser khawh kha a tawinak cun a si. Bu le zatlang nun thangchonak, thawngternak le thlennak caah a biapi.

Tahchunhnak ah Singapore ram khi a fa i an ram chuah leicung leitang kokek thilri zei huaha an ngei lo (port chim lo) nain minung thazaang thawngternak, minung pahrang thangchonak (MPT) ah biatak te in an i zuam hnu ah vawlei cung ah ram rum ram thangcho ah a chuah. Malaysia in 1963 ah zalonnak a lak lio ah minung pakhat kumkhat hlawh hi atu lio Kawlram hlawt tluk GDP per capita hi $1300 hrawng in 2016 ah ($53,000) in 2019 ah ($65,233) tiang a kainak aruang hi atu i MPT timi an ttanpi an nor ruang ah a si kan ti ahcun a palh lai lo dah. Hlan lio Singapore PM pa Goh Chok Tong kha Nepal PM nih zeiruang ah dah Sg hi hi tluk in a thangcho ti ah a hal lio ah Lee Kuan Yew a si ko a ti i a peh rih mi cu Meritocracy timi kan rak hman a ti. MPT timi minung pahrang thangchonak kan tuah hnu ah cozah ah bu ah institute ah cu ti cun mitha le miza tampi an chuah i cu nih cun thatnak-excellence an chuah pi leng ah khat le khat zuamnak an chuah pi a ti. Cu hna nih cun kan vawlei, kan ngeihchiah resources le kan institute pawl an thatter an remh i ram an thangchoter a ti.

Chinmi zong Pathian nih nuhring thluak thatnak a kan pek pin ah a sunglawimi ram, vawlei tha kan ngeimi hi hmailei caan sau caah hman thiam a hau. minung pahrang thangchonak MPT sernak caah cun a tu lio caan zong hi caan tha a si. Rampi ah daihnak um hlah hmanh seh law, mino caah caan a lak in pamter lo in, Vocational Training School maw Institute hi atulio ah on khawh asi. SNS timi social network services pawl Social media a that tik ah Zoom te hna nih tampi chawnnak a kan bawmh khawh lai caah hmunkip in kai duhmi zong online in an kai kho lai vawlei cung hmunkip in chimtu sayate zong nih volunteer an tuah khawh lai caah thil har a si lo i kaupi tuah khawh lo hmanh ah Agriculture training, Livestock Breeding, Electronics, Carpentry, Weaving, Hospitality & Tourism, Business & Management, Construction le IT tibantuk hna hi ramchung ramleng um fonh in tuah khawh ahcun a tha tuk hnga.