Myanmar Ram Milu a Cheu Nuai 25 Sifaknak an Ton Lai

Kan ram sipuazi le pawcawmnak hi nihin kan tonmi ram buainak le uknak that lo ruang ah le pulrai ruang ah a har chinchin i thin phan a si ko. Ban pawl le phaisa kong hi ruah lo awk a tha lo. 

 

Tu hrawng zung khar aa peh i a tawk ah cun bank pawl an on pah nain Aug 16 in 22 tiang kan phih lai an ti lio ah mi tampi cu an lau, ban pawl pa hnihthum an pur lai maw an cim kho tiah bia vaivuang pawl a chuah pah tik ah mi tampi cu an lau. Ram uktu le ban cung ah mipi nih zumhnak an ngei ti lo caah ban an on paoh i phaisa chuah khawh a si ahcun aho paoh chuah cio ding an si caah ban pawl nih phaisa tampi chuah khawh lo i tlawm tete lawng chuah piak a si i ban pawl zong hi phaisa an ngei taktak lo. Baho ban nih zarh fa phaisa a chuah piak hna i ATM ah an rawn pah pin ah ban ah tlawm tete an chuah piak pah hna i cu ti te cun on pah on lo pah bantuk in an umnak a sau. Ralkap zong ngunkhuai a hmu tuk ve ti lo tik ah vava a tum ve hnik cang.

 

Keimah pumpak ka ruahnak hei tial ko ning law, 

Ban pawl hi phaisa an ngei ti lo nain a pur a cim lo ding in a lam kip in an i zuam peng ko lai. A si khomi cu ralkap nih phaisa thar rial lawng hi a lam a um i cu lawng ah a rang bik in a khamh khawhmi a si. Phaisa thar rial khawhnak ding ah caan saupi zong aa zuam cang i atu ahcun a rial khawh thluamah cang lai. 

Nihin Baho ban nih thong nga ca le thonghra ca zong kan hrawk lai lo, private ban pa 3 zong license kan lakpiak (ting) hna lai lo, cun ban pawl zong an rawk lai lo guarantee kan pek hna a ti cun phaisa a thar zong kan rial lo tiah a chim. Asinain zumh dih a har. German kampani Giesecke Devrient nih tangka rial an bawm ti hna lo nain Russia le Tuluk bawmhnak an hal lai i tampi a chuah ko lai ti hi zumh a si. 

Kawlram phaisa hi man a ngeihnak a zor i thla 6 chung ah 29% hi a man a tum cang. Cucaah inflation a sang chinchin cang. Dollar hi atu nak in a kai chinchin ko lai, chim duhmi cu Kyat a man a tum lai tinak a si. 

 

Den denhnih nik a denmi kan ram cu kampani rian pawl zong an cawlcaan lem ti lo caah thil man a kai lai. Tangka thar tampi an rial lai caah Ban ah phaisa chiah a tihmi pawl nih cash pawl an cawk lai i cawk lawng a tam lai i zuar a tlawm lai caah phaisa man pawl hi an puar lai i thil man cu a kai chinchin ko lai. 

 

UN nih ram buai thawk in kum khat chung ah Kawlram milu a cheu an si a fak lai tiah a ti. Nuai 25 leng cu sifaknak tang ah an um lai i nikhat ah Kyat 2000 tang lawng in an nun a hau lai a ti. World bank nih cun Kawlram cu atu nak in a let hnih in an si a fak lai a ti. Khaute lei hi a let thum in an si a fak lai a ti.